Luns 27 de Maio de 2019

Xunta e Fundación de Enxeñería Civil de Galicia colaboran na consolidación internacional do sector galego da auga


Ambas institucións buscan situar este sector de actividade como referencia mundial na xestión dos recursos hídricos, coa confección de liñas estratéxicas que sirvan de guía para o desenvolvemento da actividade internacional

A Xunta de Galicia e a Fundación de Enxeñería Civil de Galicia colaboran na consolidación internacional do sector galego da auga. Así o establece o convenio de colaboración asinado pola conselleira de Medio Ambiente e Ordenación do Territorio, Beatriz Mato, e o presidente do Padroado da Fundación de Enxeñería Civil de Galicia (FECG), Juan Sanmartín Ferreiro.

Con este acordo, Xunta e Universidade da Coruña pretenden situar á Comunidade galega e ao sector da auga como referencia mundial na xestión dos recursos hídricos. Augas de Galicia constatou experiencias positivas en proxectos de cooperación internacional, que revelan a potencialidade de exportación e do interese que suscita a nivel internacional o modelo de xestión de recursos hídricos europeo. No caso do modelo galego, o desenvolvemento a nivel lexislativo, administrativo e técnico é un exemplo de xestión para outras rexións do mundo, recoñeceu Mato Otero.

Tal e como destacou a conselleira, esta realidade sitúa ao sector galego da enxeñería civil na vangarda mundial neste ámbito de actividade, o que representa unha oportunidade única para a súa expansión internacional e do que dan mostra os numerosos encargos que empresas e universidades galegas reciben das administracións con competencias en materia hidráulica estranxeiras.

Así, esta colaboración permitirá definir unha estratexia para o fomento da internacionalización do sector da auga galego e consolidar a presenza do mesmo neste ámbito internacional co liderazgo da Administración Hidráulica de Galicia. Neste sentido, a conselleira destacou a extensa experiencia da Fundación no desenvolvemento de proxectos internacionais de I+D+i, persoal técnico de prestixio mundial no sector da auga e unha vocación de servizo público, que a converte no socio ideal para esta colaboración.

Durante o período de vixencia do convenio, ambas institucións traballarán na confección das liñas estratéxicas que sirvan de guía para o desenvolvemento da actividade internacional do sector, potenciando aqueles ámbitos nos que con cunha maior experiencia e capacidade.

Tamén se busca consolidar a presenza internacional dos actores clave do sector, así como a imaxe da Administración Hidráulica de Galicia como institución de referencia internacional, no ámbito da xestión de recursos hídricos e bacías hidrolóxicas, que facilitará o entendemento e acceso á colaboración multiaxente con distintos países afines, neste ámbito de actividade.

Grazas a esta colaboración tamén se fomentará e coordinará a participación do sector en convocatorias que promovan lancen as distintas administracións (autonómico, estatal, comunitario ou outras institucións nacionais ou internacionais) para o desenvolvemento de proxectos de cooperación internacional ou I+D+ i.

Experiencia piloto
A conselleira de Medio Ambiente recordou que nos últimos tres anos Augas de Galicia liderou a primeira iniciativa da Xunta en materia de cooperación internacional no sector da auga. Con esta iniciativa, brindouse apoio técnico e institucional para a consolidación da Administración Rexional da Auga do norte de Mozambique. O proxecto, financiado pola Unión Europea con cofinanciamento de Cooperación Galega, foi unha experiencia piloto con éxito no referente á colaboración entre administración, universidade, organizacións sociais e empresa.

O éxito desta primeira experiencia puxo de manifesto as importantes vantaxes e complementariedade que ten abrir estas canles de colaboración, así como a necesidade de que se ordene o sector da auga para fomentar a colaboración en todo tipo de iniciativas internacionais para aproveitar todas as oportunidades existentes dando unha resposta integral e de calidade.

Deja un comentario