Domingo 23 de Setembro de 2018

A Xunta activa en Beade novas accións formativas para impulsar a creación e consolidación de empresas sobre o territorio


No marco do convenio de colaboración entre o Igape e a Fundación Incyde, o próximo luns, 11 de xuño, comezará o desenvolvemento dun novo curso para promover a creación e o crecemento de novas empresas na comarca do Ribeiro
A Consellería de Economía, Emprego e Industria, en colaboración coa Fundación Instituto Cameral para a Creación e Desenvolvemento da Empresa (Incyde), pon en marcha a partir da próxima semana un novo curso de formación e asesoramento que apoiará a creación e consolidación de novos negocios por emprendedores e autónomos da comarca do Ribeiro.

Durante sete semanas os emprendedores participantes recibirán titorías personalizadas na sede da Mancomunidade IV do Ribeiro (lugar Fondal de Beade s/n), adecuadas ás necesidades dos proxectos empresariais que pretenden desenvolver. A formación ofreceralles unha visión global das distintas áreas funcionais dun negocio coa que poder determinar as oportunidades de mercado e desenvolver un plan de empresa propio. As persoas interesadas na formación poden inscribirse a través da web da Fundación Incyde.

Este programa de colaboración, cofinanciado nun 80% polo Fondo Social Europeo (FSE), comprende tres accións formativas máis. Monforte de Lemos e Ponteareas acollerán as dúas primeiras, que comezan esta semana, mentres que a terceira se desenvolverá en Lugo, tamén a partir do próximo luns 11 de xuño.

Con estes cursos, a Consellería de Economía, Emprego e Industria prevé facilitar, durante este ano, formación e asesoramento a máis de 250 autónomos, emprendedores e empresarios, que desenvolven a súa actividade preferentemente nas diferentes comarcas afectadas polos incendios rexistrados en Galicia durante o ano pasado. O pasado mes de abril remataron as primeiras accións formativas en Beade e Ponteareas, nas que participaron máis de medio cento de emprendedores e autónomos.

Unha vez rematados os cursos, os participantes poderán seguir accedendo ao asesoramento especializado ou titoría que precisen a través do Igape dos servizos do Igape, así como ás axudas do programa Galicia Emprende, ou a préstamos directos como os activados no novo programa de instrumentos financeiros innovadores (IFIs) para financiar os seus investimentos.

Deja un comentario